Realízase un percorrido por aqueles libros de Agustín Fernández Paz en que aparece a escola, co fin de analizar como plasmou nas súas ficcións un modelo de escola democrático, integrador e galeguizador, en claro contraste cun sistema caduco canto a procedementos e metodoloxías, que acolle a violencia e perpetúa as diferenzas. Dedícase tamén un apartado ás obras con que homenaxeou mestres e mestras represaliados durante a Guerra Civil española e a posguerra, así como as ideas educativas que estes defenderon na procura dunha sociedade xusta e igualitaria.